परदेशातून भारतात आलेल्या मृणाल दुसानिसची पुन्हा अभिनय क्षेत्रात दमदार एन्ट्री…तिला साथ मिळणार ज्ञानदा रामतीर्थनकरची

परदेशातून भारतात आलेल्या मृणाल दुसानिसने पुन्हा अभिनय क्षेत्रात येण्याची इच्छा व्यक्त केली होती. तिची ही इच्छा आता लवकरच पूर्ण होताना दिसणार आहे. गेल्या काही दिवसांपासून मृणाल मालिका क्षेत्रात पदार्पण करणार अशी चर्चा होती. स्टार प्रवाहच्या सोहळ्यात देखील तिने उपस्थिती दर्शवली होती. त्यावरून मृणाल स्टार प्रवाह वाहिनीवर एन्ट्री घेतेय हे स्पष्ट झाले होते. दरम्यान मृणाल कोणत्या मालिकेत झळकणार याबद्दल तिच्या चाहत्यांना उत्सुकता लागून राहिली होती. ही उत्सुकता आता अधिक ताणून न धरता आज तिच्या या नवीन मालिकेचे नाव जाहीर करण्यात आले आहे.

“लग्नानंतर होईलच प्रेम” अशा आशयाची एक मालिका स्टार प्रवाह वाहिनीवर प्रसारित होणार आहे. या मालिकेच्या शिर्षकातच त्याचे कथानक दडलेले पाहायला मिळत आहे. मृणाल दुसानिस या मालिकेत महत्वपूर्ण भूमिकेत दिसणार असून तिला अभिनेत्री ज्ञानदा रामतीर्थनकर हिची साथ मिळणार आहे. ठिपक्यांची रांगोळी या मालिकेनंतर ज्ञानदा पुन्हा एकदा स्टार प्रवाहवर झळकणार आहे. लग्नानंतर होईलच प्रेम या नवीन मालिकेत दोघींची भूमिका नेमकी काय असणार हे लवकरच स्पष्ट होईल. तूर्तास मालिकेत या दोघींची केमिस्ट्री पाहायला प्रेक्षकांनाही नक्कीच आवडेल अशा प्रतिक्रिया त्यांच्या चाहत्यांकडून मिळत आहेत.

या मालिकेच्या जोडीला स्टार प्रवाह वाहिनी आणखी एक मालिका प्रेक्षकांसमोर आणत आहे. अशी बाबा रिटायर होत आहेत या नव्या मालिकेचा प्रोमो पाहून प्रेक्षकांनी कथानकाचे मोठे कौतुक केलेले पाहायला मिळत आहे. निवेदिता सराफ आणि मंगेश कदम या मालिकेत प्रमुख भूमिका साकारणार आहेत. त्यामुळे या दोन्ही मालिका पाहायला आवडतील अशा प्रतिक्रिया प्रेक्षकांनी दिल्या आहेत.