झी मराठी वाहिनीवर लवकरच दोन नवीन मालिका दाखल होत आहेत. २ दिवसांपूर्वी “लक्ष्मी निवास” या नवीन मालिकेचा प्रोमो प्रेक्षकांच्या भेटीला आला होता. या मालिकेत तुषार दळवी, हर्षदा खानविलकर, अक्षया देवधर आणि बरेचसे जाणते कलाकार महत्वाची भूमिका साकारताना दिसणार आहेत. तुझ्यात जीव रंगला मालिकेनंतर अक्षया पुन्हा एकदा झी मराठीवर झळकताना दिसणार आहे. तर झी मराठी आणखी एक नवीन मालिका प्रेक्षकांच्या भेटीला आणत आहे. या मालिकेचे नाव आहे “तुला जपणार आहे”.
तुला जपणार आहे या मालिकेचा पहिला प्रोमो प्रेक्षकांसमोर आला असून आई आणि मुलगी एका बंगल्यात जाताना दाखवली आहे. मालिकेच्या प्रोमोवरून ही एक भयकथा असणार आहे हे निश्चित झाले आहे. रात्रीस खेळ चाले मालिकेनंतर झी मराठी पुन्हा एकदा भय कथानक प्रेक्षकांच्या भेटीला आणत आहे त्यामुळे आतापासूनच याची उत्सुकता शिगेला पोहोचली आहे. दरम्यान या मालिकेत कोणकोणत्या कलाकारांना अभिनयाची संधी मिळणार आहे हे अजून गुलदस्त्यात आहे. पण या दोन्ही मालिकेच्या एंट्रीमुळे झी मराठीच्या २ मालिकांना प्रेक्षकांचा निरोप घ्यावा लागणार आहे..अप्पी आमची कलेक्टर या मालिकेने प्रेक्षकांच्या मनात जागा बनवली आहे.
मध्यंतरी या मालिकेचा जवळपास गाशा गुंडाळण्यात आला होता पण प्रेक्षकांच्या आग्रहाखातर मालिका सुरळीत सुरू राहिलेली पाहायला मिळाली. पण आता लवकरच अप्पी आमची कलेक्टर मालिका प्रेक्षकांचा निरोप घेईल असे जाहीर करण्यात येईल. तर दुसरी निरोप घेत आलेली मालिका आहे तुला शिकवीन चांगलाच धडा. याही मालिकेत आता लवकरच निर्णायक वळण देण्यात येणार आहे. त्यामुळे झी मराठीवर दाखल होत असलेल्या नव्या मालिकांचे स्वागतच केले जात आहे.
