मालिकेचे प्रोमो बऱ्याचदा प्रेक्षकांचे लक्ष वेधून घेत असतात. काही दिवसांपूर्वी स्टार प्रवाह वाहिनीने त्यांच्या आई बाबा रिटायर्ड होत आहेत या मालिकेचा प्रोमो प्रेक्षकांसमोर आणला. त्याला प्रेक्षकांनी भरभरून प्रतिसाद देत या आगळ्या वेगळ्या कथानकाचे कौतुक केलेले पाहायला मिळाले. आता अशाच एका मालिकेच्या प्रोमोने प्रेक्षकांना मोहित केलेले पाहायला मिळत आहे. कलर्स मराठीवर लवकरच “आई तुळजाभवानी” ही नवीन मालिका प्रसारित होणार आहे. महाराष्ट्राची कुलस्वामिनी आई तुळजाभवानीच्या अलौकिक शक्तीचा परिचय या मालिकेतून करून देण्यात येणार आहे. मालिकेचा पहिला प्रोमो आई तुळजाभवानीचे साक्षात दर्शन करून देणारा ठरला आहे कारण आईच्या रुपात असलेली देखणी नायिका पाहून अनेकांनी तिचे कौतुक केले आहे. “आईचे रूप किती खुलून दिसत आहे….साक्षात आई तुळजाभवानी अवतरली” अशा स्वरूपाच्या प्रतिक्रिया या नायिकेला मिळत आहेत. ही देखणी नायिका नेमकी आहे तरी कोण ? हे जाणून घेऊयात.
‘आई तुळजाभवानी’ या मालिकेत प्रमुख भूमिका साकारत असलेल्या अभिनेत्रीचं नाव आहे पूजा काळे. पूजा काळे आई तुळजाभवानीच्या रुपात अगदी खुलून दिसत आहे. मालिकेच्या प्रोमोतच तिने प्रेक्षकांची मनं जिंकून घेतली आहेत. पूजा काळे ही नृत्यांगना आहे. कथ्थक नृत्यात ती विशेष पारंगत असून देशभरात तिने नृत्याचे विविध कार्यक्रम केले आहेत. खरं तर तिला ही नृत्याची कला अवगत झाली ती तिच्या आईकडूनच. पूजाची आई राजश्री काळे या देखील शास्त्रीय नृत्यांगना आहेत. कल्याण, मुंबई येथे त्यांचे “नटराज नृत्यालय” या नावाने नृत्यसंस्था आहे. आजवर या नृत्यालयातून अनेक कलाकारांना त्यांनी घडवले आहे. आईच्या पावलावर पाऊल टाकत पूजाने देखील नृत्याची वाट धरली. कथ्थक नृत्याचे प्रशिक्षण घेत असतानाच तिने काही गायनाच्या स्पर्धेतही सहभाग दर्शवला होता.
कॉलेजमध्ये असतानाही पूजा तिची ही कला सादर करत असे. यातूनच विविध मंचावर तिला ही कला सादर करता आली. देवीच्या रुपात असलेला तिचा एक डान्स खूप व्हायरल झाला होता. यातूनच पूजाला अभिनय क्षेत्रात येण्याची संधी मिळाली असे म्हणायला हरकत नाही. तेजस्वी डोळे, सुंदर रूप पाहून ती या भूमिकेसाठी अगदी चपखल बसलेली पाहायला मिळत आहे. त्यामुळे निश्चितच प्रेक्षकांनाही तिच्या या देवीच्या रूपाने भुरळ घातलेली पाहायला मिळत आहे. पूजा काळे हिला तिच्या या पहिल्यावहिल्या मालिकेसाठी खूप खूप शुभेच्छा.
