अभिनयाच्या जोडीला स्वतःचा बिजनेस असावा अशी विचारसरणी आता पुढे येऊ लागली आहे. त्यामुळे गेल्या काही दिवसांत कलाकारांचं व्यवसाय क्षेत्रात पाऊल पडताना दिसत आहे. सलून, हॉटेल व्यवसाय, कपड्यांचा ब्रँड अनेक कलाकारांनी सुरू केला आहे. तर आता नुकतेच रंग माझा वेगळा या मालिकेतील अभिनेत्रीनेही तिचा नवीन स्टार्टअप सुरू केला आहे. अभिनेत्री अनुष्का पिंपुटकर हिने रंग माझा वेगळा या मालिकेत कार्तिक आणि दीपाची मुलगी कार्तिकी इनामदारची भूमिका साकारली होती.
मालिकेनंतर आता १५ नोव्हेंबर रोजी प्रदर्शित होत असलेल्या ‘पाणीपुरी’ या चित्रपटात ती दिसणार आहे. या चित्रपटाच्या प्रदर्शनाअगोदर अनुष्काने तिच्या नवीन बिजनेसची घोषणा केली आहे. “MA “Marry and Adore by या नावाने फोटोग्राफीचा व्यवसाय सुरू केला आहे. अनुष्का पिंपुटकर आणि अभिनेता मेघन जाधव या दोघांनी मिळून हा नवीन बिजनेस उभारला आहे. मेघन जाधव हा सुख म्हणजे नक्की काय असतं मालिका अभिनेता मंदार जाधवचा धाकटा भाऊ आहे. मंदार आणि मेघन दोघांनीही मराठी सह हिंदी सृष्टीतही स्वतःची ओळख बनवलेली आहे.
रंग माझा वेगळा या मालिकेत मेघनने अनुष्काच्या बॉयफ्रेंडची भूमिका साकारलेली होती. मालिकेमुळेच या दोघांची घट्ट मैत्री झाली. हे दोघेही अनेकदा एकमेकांना भेटत असतात त्यामुळे दोघे रिलेशनशिपमध्ये आहेत का? असा प्रश्नही त्यांना विचारला जातो. यावर अजून स्पष्ट उत्तर मिळाले नसले तरी दोघांनी एकत्र सुरू केलेल्या फोटोग्राफीच्या या व्यवसायामुळे त्यांना नक्कीच याबद्दल विचारले जाईल. तूर्तास या नवीन बिजनेससाठी मेघन आणि अनुष्काला भरभरून शुभेच्छा!.
