गेल्या काही दिवसांत मराठी कलाकारांची स्वप्न पूर्णत्वास येत आहेत. नुकतेच दिवाळीच्या मुहूर्तावर अमृता खानविलकर हिने मुंबईत ३ बीएचके फ्लॅट खरेदी केला. तर काही दिवसांपूर्वी अविनाश नारकर यांनीही स्वतःच्या नावाने फ्लॅट खरेदी केला. अभिनेत्री रुपाली भोसले हिनेही ठाण्यात मोठं घर घेतलेलं पाहायला मिळालं होतं. या घरानंतर आता रूपालीने आणखी एक लाखोंची किंमत असलेली कार खरेदी केली आहे.
आज भाऊबीजेच्या मुहूर्तावर रूपालीने टोयोटा ब्रँडची इनोव्हा क्रिस्टा ही तब्बल २५ लाख किंमतीची गाडी खरेदी केली आहे. त्यामुळे रुपालीचा हा आनंद आता द्विगुणित झालेला पाहायला मिळत आहे. रुपाली भोसले हिने अभिनयाची कुठलीही पार्श्वभूमी नसताना स्वतःच्या टॅलेंटवर अभिनय क्षेत्रात यश मिळवलं आहे. खरं तर बालपण अतिशय खडतर असलेल्या रुपालीने स्वतःच्या बळावर कुटुंबालाही सावरण्यास मदत केली आहे. एका नातेवाईकांच्या सांगण्यावरून त्यांच्या वडिलांनी जवळचे होते नव्हते तेवढे पैसे गुंतवले होते. यात त्यांना आर्थिक नुकसान सोसावे लागले. एवढंच नाही तर राहतं घरही सोडावं लागलं.
पडक्या पत्र्याच्या घरात त्यांच्या कुटुंबाला दिवस काढावे लागले होते. पण हळूहळू रुपालीने आईसह मिळून खाद्य पदार्थ विक्री व्यवसाय सुरू केला. यातूनच तिने पुढे अभिनय क्षेत्रात येण्यासाठी प्रयत्न केले. चित्रपट, मालिका असा तिचा यशस्वी प्रवास सुरु आहे. ठाण्यात घर झाल्यानंतर आता रूपालीने मोठ्या किंमतीची गाडी खरेदी केली आहे. आई कुठे काय करते या मालिकेत तिने साकारलेलं विरोधी पात्र प्रेक्षकांना विशेष भावलं आहे. ही मालिका आता लवकरच प्रेक्षकांचा निरोप घेत असली तरी या मालिकेने कलाकारांना मोठी प्रसिद्धी मिळवून दिली आहे.
