ठरलं तर मग या स्टार प्रवाहच्या लोकप्रिय मालिकेतील अर्जुनची बहीण अस्मिता म्हणजेच अभिनेत्री मोनिका दबडे हिने नुकतीच एक गोड बातमी शेअर केली आहे. “कुणी तरी येणार येणार गं..” म्हणत मोनिकाने तिच्या प्रेग्नन्सीबद्दल जाहीर केलं आहे. डॉक्टरांनी दिलेल्या वेळेनुसार एप्रिल २०२५ मध्ये मोनिका तिच्या पहिल्या अपत्याचे स्वागत करणार आहे. नवरा चिन्मय कुलकर्णी सोबत बाळाचे बूट हातात घेताना तिने एक फोटो चाहत्यांसोबत शेअर करताच मोनिकावर अभिनंदनाचा वर्षाव होत आहे.
ठरलं तर मग या मालिकेत मोनिकाने अस्मिताचे विरोधी पात्र साकारले आहे. त्यामुळे तिला प्रेक्षकांच्या रोषाला सामोरे जावे लागत आहे. मोनिकाने याअगोदर मानसीचा चित्रकार तो, स्वराज्यजननी जिजामाता, चिंतामणी, लव्ह लफडे अशा चित्रपटातून, मालिकेतून काम केले आहे. तर तिचा नवरा चिन्मय कुलकर्णी हाही स्टॅण्डअप कॉमेडीयन आहे. गेल्या वर्षी सहज म्हणून मोनिकाने तिचा युट्युब चॅनल सुरू केला होता. रोजचे रुटीन, रेसिपी आणि सेटवरची धमाल मस्ती अशा ब्लॉगमुळे ती सोशल मीडियावर प्रसिद्धी मिळवताना दिसते.
ठरलं तर मग या मालिकेच्या कलाकारांसोबत तिचे छान बॉंडिंग तयार झाले आहे. आता ती आई होणार या बातमीने सेटवर आनंदाचे वातावरण असणार आहे. पण यामुळे मोनिकाला काही दिवस तरी विश्रांतीसाठी ब्रेक घ्यावा लागेल. त्यामुळे तिच्यासाठी मालिकेच्या कथानकात थोडासा बदल करण्यात येईल असे चित्र पाहायला मिळेल. दरम्यान हे मातृत्वसुख अनुभवण्यासाठी मोनिका खूप उत्सुक असलेली पाहायला मिळते.
