काल मराठी बिग बॉसच्या ५ व्या सिजनची सांगता झाली. सूरज चव्हाण विजयी ठरल्याने अभिजित सावंत, डीपी आणि अंकिता वालावलकरची फॅन मंडळी काहीशी नाराज झालेली दिसली. पण या सोशल मीडिया स्टार्सचा हा प्रवास इथेच थांबलेला नाही त्यामुळे “तुम्हीच आमचे खरे विनर” अशा प्रतिक्रिया या स्टार्सना मिळत आहेत. नुकतेच अंकिता आणि डीपी दोघांचे घरातून बाहेर पडल्यानंतर मित्र मंडळींकडून जंगी स्वागत करण्यात आले. पण आता या शो मधून बाहेर पडलेल्या अंकिताला लग्नाचे वेध लागले आहेत. बिग बॉसच्या घरात जाण्यापूर्वी अंकिताने लग्न ठरल्याची बातमी जाहीर केली होती. बिग बॉसमध्ये जाणार म्हणून तिने हे लग्न पुढं ढकललं होतं. ती कोणासोबत लग्न करते हे तिने जाहीर केलं नव्हतं त्यामुळे तिचे नाव हास्यजत्रा फेम ओंकार भोजने सोबत जोडण्यात येऊ लागलं.
खरं तर दोघेही मालवणचे त्यामुळे एक इन्फ्लुइन्सर म्हणून ओंकारची अंकितासोबत भेट घडून आली होती. आणि याच गोष्टींवरून हे दोघे प्रेमात असल्याचे बोलले जाऊ लागले. ओंकार आणि माझी फक्त मैत्री आहे असे तिने यावर स्पष्टीकरण दिले होते. तेव्हा या चर्चेला पूर्णविराम मिळाला होता. पण आता आणखी एका कलाकारासोबत अंकिताचं नाव जोडलं जात आहे. हा कलाकार म्हणजेच संगीतकार, गायक कुणाल भगत होय. कुणाल भगत याने अनेक चित्रपटासाठी संगीत दिलं आहे. १० ऑक्टोबर रोजी रिलीज होत असलेल्या येक नंबर चित्रपटासाठी त्याने एक गाणं गायलं आहे. भूमी कन्या, झी मराठीचा नवीन प्रोमो, पारू , नवरी मिळे हिटलरला, नवरदेव बीएस्सी ऍग्री अशा अनेक प्रोजेक्टसाठी तो ओळखला जातो. अंकितासोबत त्याचं नाव जोडण्यामागे एक खास कारण आहे.
काही दिवसांपूर्वी कुणालने अंकिताला घेऊन ‘आनंदवारी’ ही कॅलिग्राफी बनवली होती. अंकिताला कुणालच्या या प्रोजेक्ट मध्ये झळकण्याची संधी मिळाली. कुणाल देखील कोकणचाच आहे. त्यामुळे या दोघांचे प्रेमाचे सूर जुळून आले असे याबद्दल बोलले जात आहे. पण आता या बातमीत किती तथ्य आहे हे कोकण हार्टेड गर्लच खुलासा करू शकते. कुणाल भगत हाच अंकिताचा कोकण हार्टेड बॉय आहे का यावर लवकरच उलगडा होईल कारण अंकिता तिच्या चाहत्यांपासून ही गोष्ट जास्तकाळ लपवू शकत नाही. त्यात आता लवकरच ती लग्नाच्या बोहल्यावर चढणार आहे त्यामुळे तिच्या या होणाऱ्या नवऱ्याबद्दल सगळ्यांनाच जाणून घेण्याची उत्सुकता निर्माण झाली आहे.
