Categories
actors

अग्गबाई सासूबाई मालिकेत आजोबांची एन्ट्री…हे प्रसिद्ध अभिनेते साकारणार भूमिका

अग्गबाई सासूबाई मालिका एका नव्या वळणार येऊन ठेपली आहे. बाबड्या आईच्या विरहाने आपल्या आजवर केलेल्या चुकांची कबुली शुभ्राजवळ बोलून दाखवतो. त्यामुळे बाबड्या आता सुधारत चाललाय अशी आशा शुभ्राला वाटत आहे. परंतु दुसऱ्या बाजूला बबड्याच्या आजवरच्या वागण्यावरून तो खरंच सुधारेल का? अशी भीतीदेखील शुभ्राला वाटत आहे. बबड्या सुधारेल तेव्हा सुधारेल पण सध्या मालिकेत या बबड्याला ‘कोंबडीच्या’ म्हणायला आजोबांची एन्ट्री होणार आहे. ह्या आजोबांची पाठमोरी झलक सोशल मीडियावर पाहायला मिळत आहे त्यामुळे ही भूमिका कोण साकारत आहे याबाबत विविध तर्क लावले जातात आहेत….

aggabai sasubai serial
aggabai sasubai serial

मालिकेत नव्याने दाखल होणारे आजोबा प्रसिद्ध अभिनेते “मोहन जोशी ” साकारणार असल्याची चर्चा रंगली आहे. कारण प्रोमोत पाठमोरे दिसणारे हे आजोबा मोहन जोशी यांच्या प्रमाणेच दिसत आहेत असे अनेकांनी मत व्यक्त केले आहे. मोहन जोशी याअगोदर जीव झाला येडा पिसा मालिकेत यशवंतरावांची भूमिका साकारत होते मधल्या काळात त्यांचे पात्र बदलले गेले परंतु दोन महिन्यांपूर्वी पुन्हा नव्याने ते या मालिकेतून सक्रिय झाले. अग्गबाई सासूबाई मालिकेतील आजोबा अर्थात दत्तात्रय कुलकर्णीची भूमिका रवी पटवर्धन यांनी आपल्या दमदार अभिनयाने चांगलीच वठवली होती परंतु प्रकृती अस्वास्थ्यामुळे त्यांना मालिकेत पाहता आले नाही त्यानंतर त्यांच्या निधनाच्या बातमीने केवळ बबड्याचे आजोबा म्हणून नाही तर त्यांच्या अवघ्या चाहत्यांचेच आजोबा आपल्याला सोडून गेले अशी भावना प्रत्येकाने व्यक्त केली. त्यांनी वठवलेल्या आजोबांच्या भूमिकेला योग्य न्याय मिळावा यासाठी तितक्याच ताकदीच्या अभिनेत्याची नियुक्ती करणे आवश्यक आहे मोहन जोशी या भूमिकेला योग्य न्याय देतील अशी आशा प्रेक्षकांना वाटत असल्याने पाठमोरे आजोबा तेच असावेत असे सगळ्यांना वाटत आहे. येत्या काही दिवसातच ही भूमिका नेमकी कोण साकारत आहे ते लवकरच स्पष्ट होईल …

Categories
actors

धरिला पंढरीचा चोर गाण्यातील हा “विठोबा” आठवला? १८ वर्षांपूर्वी आपले शिक्षण पूर्ण होण्याआधीच

पंढरीची वारी जयाची कुळी…,धरिला पंढरीचा चोर…कांदा, मुळा भाजी अवघी विठाई माझी अशी सुपरहिट गाणी लाभलेला चित्रपट म्हणजे “पंढरीची वारी” हा चित्रपट. दर वर्षी आषाढी एकादशीला सह्याद्री वाहिनीवर “पंढरीची वारी” हा चित्रपट दाखला जाणार हे ठरलेले असायचे. १९८८ साली प्रदर्शित झालेल्या या चित्रपटाने त्यावेळी थेटरमध्ये हाऊसफुलचे बोर्ड लावले होते. आजही हा चित्रपट तितक्याच आपुलकीने आणि आत्मीयतेने पाहिला जातो. जयश्री गडकर, बाळ धुरी, नंदिनी, राघवेंद्र काडकोळ, राजा गोसावी, अशोक सराफ (विरोधी भूमिका) अशा अनेक नामवंत कलाकारांनी चित्रपटात महत्वाच्या भूमिका बजावल्या.

bakul family photo
bakul family photo

चित्रपटाची निर्मिती अण्णासाहेब घाटगे यांची असून याचे संवाद लेखन आणि दिग्दर्शन केले होते रमाकांत कवठेकर यांनी. चित्रपटात पंढरीच्या वारीला जाताना जयश्री गडकर यांच्या कुटुंबाला वाटेतच एक चिमुकला भेटतो आणि येणाऱ्या अडचणींना दूर करत तो या कुटुंबाचे रक्षण करतो. चित्रपटात हा चिमुकला मुका दर्शवला असल्यामुळे कुठलाही संवाद न साधताच तो आपल्या निरागस अभिनयाने साऱ्यांची मने कशी जिंकून घेतो याचे हे सुंदर कथानक चित्रपटाच्या माध्यमातून प्रेक्षकांसमोर मांडले आहे. मुकाभिनय करून केवळ हावभावाद्वारे अभिनय साकारणे हे खरं तर मोठे आव्हानाचे काम परंतु त्याने ते अतिशय उत्तमरीत्या साकारलेले पाहायला मिळाले होते. साक्षात विठोबाचे रूप साकारणारा हा चिमुकला चित्रपटाच्या शेवटच्या क्षणी साऱ्यांच्याच डोळ्यात पाणी आणण्यास भाग पाडतो असे हे सुंदर कथानक या सर्वच जाणत्या कलाकारांनी आपापल्या भूमिकेतून अतिशय सुरेखपणे दर्शवलेले पाहायला मिळाले. चित्रपटात विठोबा साकारणारा हा बालकलाकार आहे “बकुल कवठेकर” त्याच्याबद्दल आज अधिक जाणून घेऊयात.

sameer kavthekar photo
sameer kavthekar photo

“बकुल कवठेकर” हा बालकलाकार याच चित्रपटाचे दिवंगत दिग्दर्शक रमाकांत कवठेकर यांचा मुलगा आहे. या चित्रपटानंतर मात्र बकुल फारसा कोणत्या चित्रपटात पाहायला मिळाला नाही. पुढे बकुलने पुण्यातील भारती विद्यापीठातून फाईन आर्टस् चे शिक्षण घेण्यासाठी प्रवेश मिळवला. मात्र आपले शिक्षण पूर्ण करत असतानाच २००२ साली बकुलचे हृदयविकाराच्या तीव्र झटक्याने निधन झाले. त्याच्यारूपाने हा कलाकार आपण खूप आधीच गमावला याचे दुःख तुम्हा-आम्हा सर्वांनाच कायम राहणार. बकुलचा भाऊ “समीर कवठेकर” हे एक निर्माते म्हणून याच क्षेत्रात कार्यरत आहेत. “बकुल फिल्म्स” नावाने त्यांनी स्वतःची निर्मिती संस्था सुरू केली आहे. “स्वराज्यरक्षक संभाजी”, ” स्वराज्यजननी जिजामाता”, राजा शिवछत्रपती” या मालिका तसेच “अजिंठा”, “बालगंधर्व” या चित्रपटाचे कार्यकारी निर्माता म्हणूनही त्यांनी आपली भूमिका बजावली आहे. खाकी, मंगल पांडे या बॉलिवूड चित्रपटासाठीही त्यांनी काम केले आहे. “बकुल कवठेकर” ह्या बालकलाकाराने ह्या चित्रपटात जे उत्कृष्ट काम केले आहे ते आजही पाहताना पाहणाऱ्याच्या चेहऱ्यावर स्मित हास्य आणत, ह्या बाल कलाकाराला आमच्या कडून मानाचा मुजरा…मराठी रंगभूमी आपला अभिनय कायम स्मरणात ठेवील.

Categories
actors

“संत तुकाराम” चित्रपटातील वैकुंठ गमनाच्या चित्रीकरणावेळी घडला होता मोठा अपघात

१९३६ साली “संत तुकाराम” हा मराठी चित्रपट प्रदर्शित झाला होता. तब्बल ५७ आठवडे चालणारा हा चित्रपट त्यावेळी प्रभात फिल्म कंपनीचे अगोदरचे सर्व रेकॉर्ड मोडीत काढणारा हाऊसफुल चित्रपट ठरला होता. परदेशात दाखवला गेलेला हा पहिला मराठी चित्रपट अशीही ओळख या चित्रपटाने निर्माण केली होती. तर १९३७ सालच्या ५ व्या व्हेनिस इंटरनॅशनल फिल्म फेस्टिव्हलमध्ये या चित्रपटाला पुरस्काराने गौरविण्यात आले होते. प्रभात फिल्म कंपनीचे विष्णुपंत दामले आणि शेख फत्तेलाल यांनी या चित्रपटाच्या दिग्दर्शकाची धुरा सांभाळली होती. विष्णुपंत पागनिस यांनी संत तुकारामांची भूमिका तर त्यांच्या मुलाची भूमिका याच चित्रपटाचे दिग्दर्शक विष्णुपंत दामले यांच्या मुलाने म्हणजेच पंडित उर्फ वसंत विष्णुपंत दामले यांनी साकारली होती.

sant tukaram movie
sant tukaram movie

चित्रपटाचे चित्रीकरण पुण्यातील प्रभात फिल्म कंपनीत जे सध्या FTII नावाने ओळखले जाते त्या स्टुडिओतच करण्यात आले होते. अगदी तुकारामांनी नदीत बुडवलेल्या गाथांचे चित्रीकरण तिथल्याच बनवलेल्या तळ्यात करण्यात आले होते. संत तुकाराम वैकुंठाला गेले हे चित्रीकरण दाखवण्यासाठी गरुडाची रचना केली होती. दोन वेळा हे गरुड कलाकारांना घेऊन उडाले परंतु तिसऱ्या वेळी मात्र ते गरुड खाली कोसळले. त्यावर बसलेले विष्णुपंत पागनिस( संत तुकारामांची भूमिका साकारणारे कलाकार) यांच्यासह असलेल्या दोन महिला कलाकार (पऱ्या) आणि गरुडामध्ये त्याचे पंख हलवण्यासाठी बसलेला एक व्यक्ती असे चौघेही त्या गरूडासोबत खाली कोसळले. या घटनेमुळे भयंकर धुळ तिथे पसरली तर गोंधळामुळे अनेकांना दुखापतही झाली. चित्रीकरण पाहायला मिळावे यासाठी प्रभात स्टुडिओत दररोज शेकडो लोकं येत असत. या अपघातावेळी स्टुडिओत जवळपास ५०० जणांचा जमाव असल्याचे सांगितले जाते. सुदैवाने महिला कलाकारांच्या बाजूने गाद्या असल्याने त्यांना काही दुखापत झाली नव्हती तर विष्णुपंत पागनिस यांना तुकारामांच्या पत्नीची भूमिका (जिजाई) साकारणाऱ्या कलाकार गौरी यांनी त्या ढिगाऱ्यातून बाहेर खेचले होते.

sant tukaram film
sant tukaram film

मात्र दुर्दैवाने गरुडाच्या आत बसलेली ती व्यक्ती या दुर्घटनेत भयंकर जखमी झाली होती. त्या व्यक्तीला तात्काळ उपचारासाठी दवाखान्यात दाखल केले परंतु यात त्यांना कायमचे अपंगत्व आले. त्यानंतरही प्रभात कंपनीने या व्यक्तीला कायमस्वरूपी कामावर ठेवले होते. चित्रपटाची आणखी एक आठवण म्हणजे प्रभातच्या चित्रपटाची सुरुवात आणि शेवट ही तुतारीच्या आवाजाने होत असे. संत तुकाराम हा चित्रपट हाऊसफुल चालला त्यावेळी चित्रपट संपला तरी शेवटच्या क्षणी ती तुतारी वाजली नसल्यामुळे प्रेक्षक जागेवरच बसून राहिले. त्यावर अयोजकाला काय करावे हेच समजेनासे झाले. यावर युक्ती काढून ऑपरेटरला त्यांनी पहिला रील दाखवण्यास सांगून पडदा खाली ओढला. तुतारी वाजली म्हणजे चित्रपट संपला असे समजून प्रेक्षकांनी आनंदाने टाळ्या वाजवल्या. चित्रपटाच्या या काही आठवणी यातील बालकलाकार असलेले पंडित उर्फ वसंत दामले यांनी एका मुलाखतीत सांगितल्या होत्या २०१५ साली वयाच्या ८७ व्या वर्षी त्यांचे निधन झाले.

Categories
actors

अग्गबाई सासूबाई मालिकेतील ह्या कलाकाराला ओळखलंत? …आता दिसणार या मालिकेत ऐतिहासिकभूमिकेत

अग्गबाई सासूबाई मालिकेतील विश्वासची भूमिका साकारणारा “भाग्येश पाटील” हा कलाकार आता आणखी एका मालिकेतून एका नव्या भूमिकेत पाहायला मिळणार आहे. ही मालिका आहे सोनी मराठी वाहिनीवरील ‘स्वराज्यजननी जिजामाता’. स्वराज्यजननी जिजामाता मालिकेने लीप घेतली असून एक नवे पर्व सुरू करण्यात आले आहे. या नव्या पर्वात डॉ अमोल कोल्हे हे छत्रपतीशिवाजी महाराजांच्या तर नीना कुलकर्णी ह्या जिजामतोश्रींच्या भूमिकेत पाहायला मिळत आहेत.अग्गबाई सासूबाई मालिकेतील विश्वास अर्थात भाग्येश पाटील देखील या मालिकेतून महत्वाची भूमिका साकारताना दिसणार आहे. ही भूमिका आहे “संभाजी कावजी कोंढळकर” यांची.

bhagyesh patil actor
bhagyesh patil actor

अफजल खान भेटी दरम्यान छत्रपती शिवाजी महाराजांनी आपल्यासोबत मोजकेच मावळे घेतले होते संभाजी कावजी कोंढळकर हे त्यातीलच एक. ही ऐतिहासिक भूमिका वाट्याला आल्याने भाग्येश पुरता भारावून गेला आहे. याअगोदर भाग्येशने तुला पाहते रे या झी वाहिनीच्या मालिकेत पत्रकाराची छोटीशी भूमिका बजावली होती. सोनी मराठीवरील “हम बने तुम बने” , झी युवा वरील “आम्ही दोघी” यासोबतच मोरया मोशन्स प्रोडक्शन प्रस्तुत “हे विठ्ठला” ,”पंख” या शॉर्ट फिल्म तसेच स्ट्रगलर साला मधूनही त्याने आपल्या अभिनयाची झलक दाखवून दिली होती. अग्गबाई सासूबाई मालिकेतील विश्वास हे त्याने साकारलेले पात्र प्रेक्षकांना खूपच भावले आहे. याच भूमिकेप्रमाणे नव्याने साकारत असलेल्या ऐतिहासिक भूमिकेवर देखील प्रेक्षक तितकेच प्रेम करतील अशी आशा त्याने व्यक्त केली आहे. प्रथमच ऐतिहासिक भूमिका साकारण्याची संधी मिळाल्याने भाग्येशने जगदंब क्रिएशन्स तसेच मालिकेच्या टीमचे आभार मानले आहेत. मालिकेत साकारत असलेल्या संभाजी कावजी कोंढळकर यांच्या भूमिकेसाठी भाग्येश पाटील याला खूप खूप शुभेच्छा…

Categories
actors

सुंदरा मनामध्ये भरली मालिकेतील सज्जनरावांची भूमिका साकारली आहे या कलाकाराने

कलर्स मराठी वरील “सुंदरा मनामध्ये भरली” मालिकेतील सज्जनराव प्रेक्षकांच्या विशेष पसंतीस उतरलेले पाहायला मिळतात. बहुतेक मालिकांमधून प्रमुख नायका नायिकेईतकीच सहाय्यक कलाकाराची भूमिका विशेष लक्षवेधी ठरलेल्या पाहायला मिळतात. मग त्याला थोडा विनोदी बाज असेल तर ती भुमिका प्रेक्षक अक्षरशः डोक्यावर घेतात. “देवमाणूस” मालिकेतील टोण्या, सरूआज्जी, “माझा होशील ना” मालिकेतील पिंट्यामामा, नैना तर “अग्गबाई सासूबाई” मालिकेतील मॅडी अशाच काही विनोदी वलय असलेल्या भूमिकांना प्रेक्षकांनी भरभरून दाद दिली आहे. याच धाटणीची सुंदरा मनामध्ये भरली मालिकेतील सज्जनरावांची भूमिका देखील लोकप्रिय झालेली पाहायला मिळते. ही भूमिका साकारणाऱ्या या हरहुन्नरी कालाकाराबद्दल काही खास गोष्टी जाणून घेऊयात…

sandesh upsham actor
sandesh upsham actor

सज्जनराव हे पात्र गाजवणाऱ्या कलाकाराचे नाव आहे “संदेश उपशाम”. संदेश उपशाम यांनी अनेक मराठी- हिंदी नाटक, चित्रपट तसेच मालिकांमधून काम केले आहे. मालिकेत सज्जनरावांची भूमिका केवळ ५ दिवसांचीच असणार असे संदेश उपशाम यांना सांगण्यात आले होते पण त्यांच्या या भूमिकेने प्रेक्षकांचे भरभरून मनोरंजन केले त्यामुळे सज्जनराव हे पात्र पुन्हा एकदा मालिकेतून सक्रिय झालेले पाहायला मिळाले. मधल्या काळात संदेश उपशाम यांनी साकारलेला सज्जनराव अचानक मालिकेत दिसेनासा झाला त्यामुळे तो परत येईल का?.. तो कुठे गेला आहे?… असे प्रश्न प्रेक्षकांनी सोशल मीडियावर विचारले होते हेच त्यांच्या अभिनयाचे खरे यश म्हणावे लागेल. आता तर लतिकाचा बॉस म्हणून सज्जनराव मालिकेत पाहायला मिळत आहेत सज्जनराव या पात्राच्या वागण्यात आणि बोलण्यात एक साधेपणा आणि भोळेपणा जाणवतो, आपलं प्रेम मिळवण्यासाठी काय काय प्रयत्न करतात हे पाहणं आता औत्सुक्याचे ठरत आहे. अभिनयासोबतच संदेश उपशाम हे बृहन्मुंबई महानगरपालिकेत नोकरी करत आहेत. अभिनय आणि नोकरी अशी त्यांची तारेवरची कसरत सध्या सुरू आहे. “पळा पळा कोण पुढे पळे तो..”, “गेला उडत”, “करून गेलो गाव”, “स्पिरिट”,” नकळत दिसले सारे”, “ढॅण्टॅढॅण” अशा दमदार नाटकांतून त्यांनी विविधांगी भूमिका साकारल्या आहेत. बंध नायलॉनचे, पोश्टर बॉईज, इत्तेफाक, क्या हाल मि. पांचाल अशा मालिका आणि चित्रपटातूनही त्यांनी भूमिका साकारून प्रेक्षकांचे मनोरंजन केले. तूर्तास संदेश उपशाम यांना सुंदरा मनामध्ये भरली मालिकेतील सज्जनरावांच्या भूमिकेसाठी खुप खुप शुभेच्छा…

Categories
actors

याला जबाबदार कोण?…म्हणत महेश टिळेकर यांची खेदजनक प्रतिक्रिया

टीआरपी म्हणजेच त्या मालिकेचे खरे यश असे म्हटले जाते. मुळात मालिकेचे कथानक कितीही उत्तम दर्जाचे असुदे किंवा त्यातील कलाकार हे किती ताकदीने आपली भूमिका अभिनयातून जिवंत करतात याला सध्याच्या घडीला कुठलेच महत्व नसते असे मत दिग्दर्शक महेश टिळेकर यांनी मांडले आहे. सोनी मराठी वाहिनीवर सावित्री ज्योती ही एक दर्जेदार कथानक असलेली मालिका प्रेक्षकांचा निरोप घेत आहे त्यामुळे महेश टिळेकर यांनी एक पोस्ट शेअर करून मालिकेप्रति आपली भावना व्यक्त केली आहे ते आपल्या पोस्टमध्ये म्हणतात की…

savitrijoti marathi serial
savitrijoti marathi serial

याला जबाबदार कोण? ’सावित्री ज्योती’ ही महात्मा जोतिबा आणि त्यांची पत्नी सावित्रीबाई फुले यांच्या जीवनावर आधारीत मराठी मालिका केवळ मालिकेला टी आर पी नाही म्हणून बंद होत आहे हे ऐकून नक्कीच मला दुःख झाले. ओंकार गोवर्धन या अभिनेत्याने साकारलेली ज्योतिबा फुले यांची भूमिका आणि तितक्यात ताकदीने सावित्रीबाईंची भूमिका करणारी अभिनेत्री अश्विनी कासार यांच्या अभिनयाचे कौतुक करावं तितकं कमीच आहे.पण मग चांगलं कथानक असूनही आपल्या महापुरुषांच्या जीवनावर,कार्यावर आधारित मालिका पहायला प्रेक्षकांना उत्साह का नसावा? नवऱ्याची लफडी,सासू सूनांची भांडणं, येता जाता एकमेकींच्यावर कुरघोडी करणाऱ्या जावा,हे असं सगळं बटबटीत पहायचीच प्रेक्षकांना, विशेषतः महिला प्रेक्षकांना आवड असते का असा प्रश्न आता उभा राहिला आहे. विनोदाच्या नावावर माकडचाळे करून नक्की विनोद कश्याला म्हणायचं असा प्रश्न पडावा पण बघणारे काहीही करून हसत आहेत यातच आपल्या अभिनयाचं श्रेय आहे असं मानून काम आणि पैसे मिळाले की त्यातच सुख मानणारे कलाकार .बरेचदा परिस्थितीमुळे अनेकांना हे करणं भाग पडतं पण काही रियालिटी शोमध्ये विनोदाचा दर्जा आणि आब राखून लोकांचे लाडके ठरलेले गुणी विनोदी कलाकारही आहेतच. अभिनयाची भूक असणारे ओमकार गोवर्धन, अश्विनी कासार सारखे कलाकार उत्तम अभिनय करूनही त्यांची मालिका फक्त प्रेक्षकांचा चांगला प्रतिसाद न मिळाल्यामुळे बंद होत असेल तर या कलाकारांना किती दुःख होत असेल,की जीव तोडून मेहनत घेऊन टी आर पी च्या धंदेवाईक स्पर्धेत त्यांची मालिका यशस्वी झाली नाही.
सावित्री ज्योती सारख्या उत्तम मालिका प्रेक्षकांच्या पाहिजे तसा प्रतिसाद न मिळाल्यामुळे बंद होते याला जबाबदार काळानुसार बदलत चाललेली प्रेक्षकांची आवड की आणखी कुणी?” महेश टिळेकर

Categories
actors

फुलाला सुगंध मातीचा मालिकेतील ‘जिजीअक्का’ आहे प्रसिद्ध अभिनेत्रीची सून

फुलाला सुगंध मातीचा मालिकेत जिजीअक्काची भूमिका साकारली आहे अभिनेत्री “अदिती मूलगुंड- देशपांडे” यांनी . स्टार प्रवाह वाहिनीवरील फुलाला सुगंध मातीचा या मालिकेला प्रेक्षकांकडून चांगला प्रतिसाद मिळत आहे त्यातील कीर्ती, शुभम या प्रमुख भूमिकेइतकीच जिजीअक्काच्या भूमिकेला प्रेक्षकांकडून चांगलीच दाद मिळत आहे. अदिती देशपांडे यांच्याबद्दल आज अधिक जाणून घेऊयात… अदिती देशपांडे यांनी ” पेहरेदार पिया की” या हिंदी मालिकेत महत्वाची भूमिका बजावली होती. नॉट ओन्ली मिसेस राऊत, जोगवा, दशक्रिया ह्या त्यांनी अभिनित केलेल्या चित्रपटांना अनेक पुरस्काराने गौरविण्यात आले आहे. अभिनेत्री अदिती देशपांडे या प्रसिद्ध अभिनेत्री “सुलभा देशपांडे” यांच्या सून आहेत. सुलभाताई देशपांडे ह्या पूर्वाश्रमीच्या सुलभा कामेरकर.

famous marathi actress
famous marathi actress

छबिलदास शाळेत त्यांनी आपले शिक्षण घेतले त्याच शाळेत त्यांनी शिक्षिकेची नोकरी स्वीकारली. याचदरम्यान राज्यनाट्य स्पर्धा त्यांनी गाजवल्या. ११५ मराठी आणि २११ हुन अधिक हिंदी मालिका त्यांनी गाजवल्या ह्यावरूनच त्यांचा हिंदी मराठीतील दांडगा अनुभव प्रत्ययास येईल. रंगभूमीमुळेच सुलभाताईची आणि अरविंद देशपांडे ह्यांची ओळख झाली. जवळपास दोन वर्षे त्यांनी प्रेमाच्या आणाभाका गिरवल्या आणि रंगभूमी सोडणार नाही ह्या वचनावर लग्न करण्याचा निर्णय घेतला. लग्नानंतर “निनादचा” जन्म झाला. १९६७ साली “शांतता कोर्ट चालू आहे” हे सुलभा ताईंनी अभिनित केलेले नाटक तुफान गाजले . त्यात त्यांनी साकारलेली लीला बेणारेची भूमिका अजरामर झाली. हाऊसफुल चे बोर्ड लावले अरविंद देशपांडे ह्यांनी बहुतेक चित्रपटात विरोधी भूमिका साकारल्या. बाळाचे बाप ब्रह्मचारी , चाणी, शापित सारख्या अनेक हिंदी मराठी चित्रपटात त्यांच्या भूमिका विशेष लक्षवेधी ठरल्या. ” प्रेमाच्या गावा जावे ” ह्या नाटकाचे प्रयोग चालू होते याचदरम्यान ३ जानेवारी १९८७ रोजी त्यांच्या निधनाच्या बातमीने अवघ्या सिने सृष्टीत शोककळा पसरली. “अविष्कार” चे संस्थापक म्हणून अरविंद देशपांडे यांच्या स्मृतीप्रित्यर्थ आजही महोत्सव आयोजित केले जातात. त्यांच्या मृत्यूनंतर सुलभाताई डगमगल्या नाहीत उलट त्यांच्या पाठी रंगभूमीची अविरत सेवा अशीच चालू ठेवण्याचे व्रत त्यांनी निभावले. मिसेस तेंडुलकर, विजेता, दुनिया, खून भरी मांग, जादू का शंख, कस्तुरी, अल्पविराम, अस्मिता सारख्या मालिका चित्रपट साकारत तब्बल ३४ पेक्षा जास्त जाहिरातीत काम करून जॉन्सन अँड जॉन्सन कंपनीच्या ब्रँड ऍम्ब्यासिडर बनल्या. अखेर ४ जून २०१६ रोजी सुलभाताई देशपांडे यांचे निधन झाले आणि एक हरहुन्नरी कलाकार गमावल्याची खंत अनेकांनी व्यक्त केली.

Categories
actors

आजतागायत सैनिकांसाठी प्रतिवर्षी १,००,००० चा धनादेश देणारा सच्या कलाकार

भारतीय चित्रपट सृष्टीचे जनक दादासाहेब फाळके यांनी १९१३ साली ‘राजा हरिश्चंद्र’ हा पहिला मूकपट साकारला होता. त्याकाळी स्रियांनी चित्रपटात काम करणे गैर मानले जायचे त्यामुळे स्त्री पात्र देखील पुरुषांनीच साकारलेली पाहायला मिळत असत. त्याच वर्षी त्यांनी ‘मोहिनी भस्मासुर’ हा आणखी एक चित्रपट प्रेक्षकांसमोर आणला. यात प्रथमच दुर्गाबाई कामत यांनी पार्वतीची भूमिका साकारली होती तर त्यांची मुलगी कमलाबाई कामत ह्यांनी बालकलाकाराची भूमिका साकारली होती. त्यामुळे भारतीय चित्रपट सृष्टीतील पहिली अभिनेत्री होण्याचा मानही त्यांनी मिळवला होता. पुढे त्यांची मुलगी कमलाबाई कामत यांचे लग्न रघुनाथराव गोखले यांच्यासोबत झाले. चंद्रकांत गोखले हा त्यांचा थोरला मुलगा. घरची परिस्थिती बेताचीच असल्याने चंद्रकांत गोखले यांना शालेय शिक्षण घेता आले नाही.

chandrakant gokhale family
chandrakant gokhale family

त्यांच्या आईनेच त्यांना घरी राहून लिहायला वाचायला शिकवले. कधीही शाळेत न गेलेल्या चंद्रकांत गोखले यांनी मिरजेच्या ब्राह्मणपुरीतील प्राथमिक शाळा क्र १ चं मुख्याध्यापक पद भूषवलं होतं. आजी आणि आई कडून अभिनयाचे बाळकडू मिळालेल्या चंद्रकांत यांनी वयाच्या ७ व्या वर्षापासूनच नाटकात काम करण्यास सुरुवात केली. वयाच्या नवव्या वर्षी ‘पुन्हा हिंदू’ या नाटकातून त्यांनी अभिनय क्षेत्रात पदार्पण केले. अभिनयासोबतच गायनाचे शिक्षणही त्यांनी घेतले होते. गदिमांनी लिहिलेल्या गीतरामायणातील दहाव्या गीताचे गायन चंद्रकांत यांनी केले होते. नटसम्राट, भावबंधन, पुरुष, बॅरिस्टर, राजसन्यस, पुण्यप्रभाव अशी नाटकं आणि माझं घर माझी माणसं, धर्मकन्या, धाकटी जाऊ, मानिनी, जावई माझा भला, रेश्माच्या गाठी,रायगडचा राजबंदी, देवघर यासारख्या चित्रपटातून भूमिका साकारल्या. काही हिंदी चित्रपटातूनही एक चरित्र अभिनेते म्हणून ते प्रेक्षकांसमोर आले. उत्कृष्ट वक्तृत्वशैली आणि भावनेला भेदणारी संवादफेक ही त्यांच्या अभिनयाची वैशिष्ट्ये. आपल्यातील एक सच्चेपणा आणि साधेपणा त्यांनी आयुष्यभर जपला. अभिनय हा त्यांचा व्यवसाय पण फक्त पैशासाठी काम करण्याची धंदेवाईक वृत्ती मात्र त्यांच्यात नव्हती, याचाच गैरफायदा अनेकांनी घेतला. केलेल्या कामाचा मोबदलाही न दिल्याने त्यांची अनेकदा फसवणूकही झाली. आयुष्यात येणाऱ्या अडचणींना त्यांनी कधीच कुणाला दोष दिला नाही. आपल्या कारकिर्दीची दखल घेत बालगंधर्व पुरस्कार, नटश्रेष्ठ नानासाहेब फाटक पुरस्कार, व्ही शांताराम पुरस्कार अशा अनेक पुरस्कारांनी त्यांना सन्मानित करण्यात आले.

actor chandrakant gokhale
actor chandrakant gokhale

१९९९ साली कारगिल जवनांसाठी पन्नास हजार रुपयांचा धनादेश त्यांनी देऊ केला होता. आपल्या स्वकमाईचे काही पैसे त्यांनी बँकेत मुदत ठेवीमध्ये गुंतवले. यातून देशाची सेवा करताना अपंगत्व आलेल्या सैनिकांच्या मदतीसाठी म्हणजेच ‘ क्वीन मेरीज टेक्निकल इन्स्टिट्यूट फॉर डिसेबल्ड सोल्जर्स’ या संस्थेला बँकेतील मुदत ठेवीवर मिळणाऱ्या व्याजाचा एक लाख रुपयाचा धनादेश दर वर्षी देण्याचा निर्णय घेतला. दर वर्षी २६ फेब्रुवारी रोजी आपली आई कमलाबाई आणि पत्नी हेमा यांच्या स्मरणार्थ हा धनादेश संस्थेकडे सुपूर्त करण्यात येतो. आयुष्याच्या अखेरीस कर्करोगाने ग्रस्त असलेले चंद्रकांत गोखले यांनी २० जून २००८ रोजी पुण्यातील जोशी रुग्णालयात अखेरचा श्वास घेतला. त्यांच्या मृत्यू पाश्चातही त्यांनी सुरू केलेला सहायता निधीचा हा उपक्रम असाच चालू आहे. त्यांचा हा वारसा त्यांचा मुलगा आणि ज्येष्ठ अभिनेते ‘विक्रम गोखले’ यांनीही असाच आत्मसात केलेला पाहायला मिळतो. काही दिवसांपूर्वीच पुण्यातील नाणे गावातील पौंड जवळील स्वमालकीची एक एकर जमीन त्यांनी अखिल भारतीय मराठी चित्रपट महामंडळाला दान केली. ज्येष्ठ कलावंत आणि एकटे राहणाऱ्या कलाकारांना आसरा मिळावा याउद्देशाने त्यांनी आपली ही जमीन या मंडळाला मोफत देऊ केली आहे. कलेचा वारसा सोबतच निःस्वार्थपणे मदतीचा हात पुढे करणाऱ्या ह्या दोन्ही सच्च्या कलाकारांना आमचा मानाचा मुजरा…

Categories
actors

“दोन दिवसांपूर्वी एक मेसेज आला”… अशा परिस्थितीत काय करावं गलगले? म्हणत विचारला प्रश्न

मागील बऱ्याच दिवसांपासून मराठी कलाकारांना इन्स्टाग्राम अकाऊंट वापरण्यावरील निर्बंधांमुळे किंवा ते हॅक केल्याच्या कारणास्तव नाहक मनस्ताप सहन करावा लागत आहे. मिसेस मुख्यमंत्री मालिकेतील सुमी अर्थात अभिनेत्री अमृता धोंगडे हिचे देखील इन्स्टाग्राम अकाउंट काही दिवसांपूर्वी अशाच पद्धतीने हॅक केले होते. त्यानंतर स्वप्नील जोशीला देखील अशाच नाहक त्रासाला सामोरे जावे लागले होते. आता हीच परिस्थिती अभिनेता भरत जाधव सोबतही घडलेली पाहायला मिळत आहे परंतु याचे कारण थोडे वेगळे असल्याकारणाने शेवटी “अशा परिस्थितीत काय करावं गलगले…!!!” म्हणत भरत जाधवने मिश्किल प्रश्न विचारून नेहमीप्रमाणेच चाहत्यांना हसवण्याचा प्रयत्न केला भरत जाधव आपल्या पोस्टमध्ये नेमका काय म्हणतो ते पाहुयात…

actor bharat jadhav
actor bharat jadhav

दोन दिवसांपूर्वी एक मेसेज आला की तुमची account verification ची रिक्वेस्ट प्रोसेस मध्ये आहे पुढील लिंकवर जाऊन तुमचा लॉगिन ID,पासवर्ड आणि मोबाईल नंबर सबमिट करा. मी ते केलं. काल रात्री परत एका वेगळ्या अकाऊंट वरून एक मेसेज आला की तुम्ही Instagram च्या कॉपी राईट कायद्याचा भंग केला आहे, तुमच्या अकाऊंट बद्दल बऱ्याच तक्रारी आल्या आहेत त्यामुळे पुढील 48 तासात तुमचं अकाऊंट कायमस्वरूपी बंद करण्यात येइल. मी रिप्लाय दिला की माझे फोटो मी स्वतः पोस्ट करतोय यात कॉपी राईट चा संबंध येतो कुठे..? तर त्यांचं म्हणणं असं होत की तुमच अकाऊंट तुम्हाला चालू ठेवायचं असेल तर पुढील लिंकवर जाऊन तुमचा लॉगिन ID,पासवर्ड आणि मोबाईल नंबर सबमिट करा. बर मीही जास्त विचार न करता तो सबमिट केला. तर त्यांचा रिप्लाय आला की तुम्ही दिलेली माहिती चुकीची आहे. गंमत अशी झालीय की मी अकाऊंट काढल होत २०१३ ला त्यानंतर मी फारस कधी लॉगिन- लॉग आऊट केलं नाही. त्यामुळे माझा पासवर्ड आता मलाच लक्षात नाही. ईमेल आयडी ची पण तीच अवस्था. बर जो मोबाईल नंबर ह्या अकाऊंट ला रजिस्टर केलाय तो बरीच वर्ष झाली मी वापरत नाही. तो आता भलत्याच माणसाच्या नावे आहे. बर तो जो कोणी इसम माझं अकाऊंट 48 तासात बंद करणार आहे तो आता म्हणतोय आधी पासवर्ड रिसेट करा… आणि पुन्हा सगळे डिटेल्स मला द्या नाहीतर तुमचं अकाऊंट १००% बंद करेन. अशा परिस्थितीत काय करावं गलगले..!!!

Categories
actors

म्हणून चाहते भेटायला आल्यावर कमीतकमी विचारा…अज्याची भूमिका साकारणाऱ्या नितीशने खंत केली व्यक्त

लागींर झालं जी मालिकेतून अजिंक्य आणि शितलची भूमिका साकारणाऱ्या कलाकारांवर प्रेक्षकांनी भरभरून प्रेम केले. विशेष म्हणजे नितीश चव्हाणने साकारलेला फौजी( अजिंक्य) प्रेक्षकांना खूपच भावला. याच भूमिकेमुळे नितीश अनेक तरुणींना भुरळ घालू लागला. अगदी मालिका सुरू असताना देखील सेटवर आपल्या या आवडत्या कलाकारांना भेटण्यासाठी चाहते गर्दी करू लागत असत. मालिकेने प्रेक्षकांचा निरोप घेतला असला तरी हे चाहते आपल्या आवडत्या कलाकारांना कधीच विसरू शकत नाहीत. आज अशाच एका चाहतीने अचानक एक्झिट घेतल्याचे नितीश चव्हाणला समजले तेव्हा तो खूपच भावुक झाला आणि आपण भेटू शकलो नाही याची खंत देखील व्यक्त केली. आपल्या पोस्टमध्ये तो म्हणतो…

nitish chavan fan
nitish chavan fan

“तुझ्याबद्दल बातमी कळाली खूप वाईट वाटलं. मला माहित न्हावतं तुझ्या हृदयामध्ये छिद्र होत आणि तुझी शेवटची इच्छा मला भेटण्याची होती, हे तर ऐकून पायाखालची जमीनच सरकली. तुझ्याबद्दल बऱ्याच जणांकडून ऐकलं होतं, पण मला तू भेटण्यासाठी काय काय केलंस हे आत्ताच समजलं, ऐकून धक्काच बसला, वाटलं नव्हतं कोणी आपल्याला भेटण्यासाठी एवढं काय काय करेल, खरंच तू ग्रेट आहेस, सलाम आहे तुला. तुझ्यासारखी फॅन होणे अशक्य आहे. माफ कर मला कामामुळे मी तुला भेटू शकलो नाही पण एवढं नक्की सांगेन या जन्मी नाही भेटता आलं पण पुढच्या जन्मी मी तुझा फॅन होऊन नक्की भेटेन तुला. मला एवढं प्रेम दिलंस खुप खुप आभारी आहे तुझा. देव तुझ्या आत्म्यास शांती देवो….” नितीश च्या या पोस्टने एक चाहती आपल्यासाठी काय काय करू शकते म्हणून भारावून गेला पण त्याच क्षणी ती आज या जगातच नाही हेही सत्य पुरेपूर उमजून चुकला. त्याचसाठी सर्वच कलाकारांनी किमान आपल्या कामातून थोडा वेळ काढून आपल्याला भेटायला आलेल्या चाहत्यांसोबतही घालवायला हवा. कारण न जाणो हे चाहते तुमच्या आयुष्यातही थोडाफार आनंद वाढवायला कारणीभूत ठरू शकतील . चाहत्यांचा प्रतिसाद हीच त्या कलाकारासाठी खरी दौलत आहे हे विसरून चालणार नाही….